అంతా అయిపోయినట్టూ...

కే. శివారెడ్డి  జైత్ర యాత్ర అనే కవితా సంకలనం లోని " అంతా అయిపోయినట్టూ" అనే కావ్యం నన్ను బాగా ఆకర్షించింది...
ఆ కావ్యం అచ్చం తెలంగాణ యాసలో లేకపోయినా... ఆ విప్లవ వాసన... ఆ పోరాటం పటిమ... ఉవ్వేతున ఎగుస్తున్న ఉడికే రక్తపు ఊపిరి...
నా దేహనికున్న ఎంటిక ఎంటికను నిక్కబొడిపించింది... మన ఉద్యమానికి మల్ల ఊపిరిపోస్తుందని మీతో పంచుకుంటున్నా

అంతా అయిపోయినట్టూ
యుద్ధం చేసి అలిసిపోయినట్టూ చతికిల పడ్డారేం
దిక్కులు చూస్తున్నారేం
తెగ ఆయాసపడి పోతున్నారేం
ఇంకా అసలు యుద్ధం మొదలవ్వ లేదు
ఆకాశంలో అక్కడక్కడా మేఘాలు కూడుకుంటున్నాయి
భూమి పొరల్లో చిన్నగా జ్వరం మొదలయ్యింది
అక్కడో మెరుపూ ఇక్కడో మెరుపూ కాస్త ఆశను కలిగిస్తున్నాయి
అక్కడో చుక్కా ఇక్కడో చుక్కా
కనపడీ కనపడనట్టు చీకట్లో దోవని చూపిస్తున్నాయి
అంతా అయిపోయినట్టు
సమస్తం సాధించినట్టు విశ్రాంతి తీసుకుంటున్నారేం
కాళ్ళు బార్ల చాపి
వీపు సంసారం గోదాకానించి సుఖనిద్ర పోతున్నారేం
కాస్త ఊపిరాడక పొయ్యేసరికి
జెండాలన్నీ చుట్టచుట్టి చంకనబెట్టి
'తునా బొడ్డుమ్బాల్' అని చేతులెత్తేశారేం
ఆవిరికమ్మి చెమట పట్టటం మొదలయ్యేసరికి
రాసుకున్న ఎర్రరంగు కరిగిపోవటం మొదలయ్యింది
యుద్ధం చేసినట్టూ
విజయం సాధించినట్టూ
జయకేతనం ఒక అట్టముక్క ముక్కుకి వేళ్ళాడేసుకుని
బజార్లన్నీ ఊళ్ళన్నీ దేశాలన్నీ కలియదిరుగుతున్నారేం
ఇంకా యుద్ధం మొదలవ్వలేదురా - నాయనా
ఇప్పుడిప్పుడే కాస్త యుద్ద వాతావరణ మేర్పడుతోంది
పిండదశలోనే బిడ్డను కన్నంత శ్రమపడుతున్నారేం
వర్శమొచ్చే సూచనలున్నాయి - రా - బయటికి - రా
                                  -- కే.శివారెడ్డి 8 October 1987

వెంకట స్వామి అన్నా థాంక్ యు నాకు ఆ పుస్తకాన్ని ఇచ్చి చదవమన్నందుకు...

జై తెలంగాణ జై జై తెలంగాణ
శ్రీనివాస్ రెడ్డి కొంపల్లి